«Massa pacs cugnuoschan il poet ramoschan Jachen Luzzi. Ma blers s’algordan da poesias o da fragmaints da poesias da Jachen Luzzi - sainza savair ch’el es l’autur.
Ils scolarins ladins dals ons quaranta, tschinquanta e sesanta savaivan ourdadoura poesias sco 'Il chavrerin', 'Di d’inviern', 'Tumasch' o 'Malgiaretta'. Per els sun quellas restadas inschmanchablas.
«La stà ais a fin / mas charas chavrettas, / e vos chavrerin / s’lasch’uossa sulettas ...», «Juhui, la naiv / la naiv ais qua! / ot sco la saiv / ell’ais fingià», «Tumasch nu maina plü la penna / a scoula ha’l fini dad ir; / ingon va el davo la benna, / que ais per el un divertir» obain «... schi cun aua’m poss lavar, / ch’eu nun ha da’m varguognar» o «... nu sast manar / plü bain co quai!»: poesias interas, singulas strofas o eir be fragmaints, citats bod sco proverbis, sun dvantats patrimoni cultural d’interas generaziuns.
Cul preschaint volüm lessna dar nouva preschentscha a l’ouvra da Jachen Luzzi.
Forsa chi’ns grataja perfin da dar ün impuls a magisters e scolars dad hoz da s’avicinar a quels texts, da tils leger e da tils imprender ourdadoura, sco chi han fat a seis temp lur tats e tattas o nonas e bapsegners.
Quai sun texts chi, adonta da la distanza temporala, han mantgnü lur charme tuot particular.»
(part da la prefaziun da Mevina Puorger e Jachen Andry, *
editionmevinapuorger*)